بعد شهر من المتعة والاسترخاء برفقة الاهل و الاصحاب والاسبان جاءت لحظة الرحيل ، وما اصعبها من مشاعر .
نحن عائلة تبارك الرحمن مكونة من 17 شخص ورحلة العودة ( ملقا- مدريد – فرانكفورت – كويت ) ورحلة صباحية و ما تتخيلون العسارة مع تقعد اليهال و اللوية .
اول ما وصلنا كاونتر الايبيرية واستقبلونا بخبر عدم نقل العفش الى الكويت مباشرة والله كان وجه لوالد مافي لون من هول الصدمة طبعا عيزنا منهم رحلة القدوم نقلتو اشلون اللحين لا ماكو قفلاو و الكونكشن بس ساعتين في كل مطار فلا الله يستر .
تأخرت رحلة ملقا بالطيران 45 دقيقة فبطبيعة الحال ليس هناك متسع لنقل العفش و بمطار مدريد كان شكلنا أكشن نفس فيلم هوم الون لما كل العايلة تركض بالمطار، والوالدة الله احفظها ضاعت مع عيال اختي وقامت تبكي خافت ارد الكويت ونخليها ما درت اهيا راس المال .وقطار و لويا وطرنا من مدريد و وصلنا فراكفورت بالسلامة و لازم انصير بسرعة البرق والريح بس اجواء المانيا العسرة كانت ضدنا . ولا جنطة وصلت وعلى ما بلغنا بعدم وصولهم و غيرنا التيرمنال واستقبلنا المفاجأة باغلاق الكاونتر من 5 دقايق بس طبعا كلمناهم ان اعتبروها حالة انسانية احنا 17 نفر ومعانا 6 اطفال وما معانا وله جنطة بس نبي بوردنج بس المان منبع العسارة وطبعا كلمان كلمنا بس عمك اصمخ .
التذاكر اتروح عليكم ولازم اتقصون تذاكر يديدة والحين رجعة الناس حق رمضان ف مستحيل نلقالكم مع بعض و اقرب شيء انحصلكم بعد 4 ايام ( صدمة ناااااار ) وكان شكلنا لاجئين واليهال الي ينام والي يقعد متعسر والي يوعان وانتوا رايحين .
طبعا شفنا بمطار فركفورت شيء خيالي من المعاملة الجلفة حتى اليهال ذا صاحاو ايون ازفونا يمشون وينزرون صج حسيت بقيمة الاسبان هاليوم . الكل انتشر على مكاتب الحجز لعل وعسى اتصير معجزة معانا و تمينة على هالحال 6 ساعات تقريبا ، موقف ضحكنى فجأة التفت على اختي الصغيرة ولا تبكي ودموع اربع اربع جان اقولها عيل منتاي رايحة مع اسطول الحرية حق غزة فجأة اصرخت لاااااااااا و تبكي حيل ما اقدر ما اقدر كسافة .
لقولنا حل انه يحيطونا على الانتظار حق الرحلة اللي بعدها ب 500 يورو للرحلة وغير مسترجعة و انشاء الله نركب وكنا خلاص بنختار هالحل بس حمدالله الله ساقلنا كويتي قال لا يقصون عليكم انا ثالث يوم ادفعوني وما اطير و انا نفر واحد ف انساو اطيرونكم . كل البيبان اتسكرت اللهم آجرني في مصيبتي واخلفني خيرا منها ، إنا لله وانا إليه راجعون و أكثر شخص عور قلبي الوالد ربي احفظه كان ويهة اعور القلب حاس بامانة 16 نفر الي معاه ....
ويا الفرج حمدالله لقولنا كلنا عن طريق الاردن مبيت ليلة و نرجع الكويت طبعا الشعور ماي بارد انكت على اقلوبنا حمد الله والرحلة بعد 3 ساعات فشعور خطير يلا بسرعة نبي نصعد الطيارة مو مصدقين طبعا سعر الرحلة كان 3 أضعاة سعر التذكرة الاساسية بس حمد الله على قولات الوالد انقطها على ظرف جذي ولا على احد مريض من عيالنا .
وطرنا حمدالله كالقتلة الى مطار عمان طبعا مطار عمان كان شيء لا يوصف مادري بعد مطارات اوربا ونظامها يتنا صدمة بس اتوقع اهوا صج اكشن و لازم انبات في فندق وماكو خيار الا فندق المطار لان الشغالات ما عندهم فيزا للاردن وفندق المطار اتوقع الكل سامع عنه و قلنا يلا تقزورة ولا انعسر الوالد ورحنة فندق الملكة عاليا ، انا افهم فندق لما يكون قديم بس وسخ ما افهم خاصة انه الاردن محطة مهمة بالنطقة الفندق بالضبط ستايل مسلسل درس خصوصي فندق شهر العسل في لندن عاد تخيلاو معايا على ماكو نظافة وكلشاي وسخ حتى خفنا اليهال يحبون او يمسكون شيء .
وعدت على خير بي لك الحمد وما ادري اشلون نمت بهالاجواء و قعدنا بقمة النشاط متحمسين للردة وطبعا وايد كان اعسر مطار الاردن قمة الزحمة وكل الناس بتهاوش معانا وبس خواتي افصلاو خلاص بس الله لطف ويسر ووصلنا وكان شعوري ودي اسجد شكر بالمطار بس خفت ويهي ينسلخ من الحر ، حمد الله رجعنا سالمين وبدون ولا جنطة جد اول مرة اسمع دعاء السفر بالطيارة وابكي ( اللهم اني اعوذ بك من وعثاء السفر )
الدروس المستفادة :
ما راح افكر اطب المانيا حتى لو ترتانزيت
تقسيم العدد الكبير على مجاميع
الاهل نعمة كبيرة احمد ربي كل دقيقة عليها
ما ضاقت إلا لتفرج
وسامحوني على الاطالة بس هم هذا مختصر هناك مواقف وآكشنات أكثر
